ਕਿਰਤਪਾਲ ਸਿੰਘ ਗਿੱਲ

" ਅੱਧੀ ਰਾਤੀਂ ਪੀੜਾਂ ਕੂਕਣ "

ਅੱਧੀ ਰਾਤੀਂ ਪੀੜਾਂ ਕੂਕਣ

ਕੂਕਣ ਕੇਸ ਖਿਲਾਰ,

ਕੁੱਝ ਕੁ ਰੰਡੀਆਂ ਕਰਨ ਸਿਆਪੇ

ਬਿਠਾ ਮੈਨੂੰ ਵਿਚਕਾਰ,

ਅੱਧੀ ਰਾਤੀਂ ਪੀੜਾ ਕੂਕਣ

ਕੂਕਣ ਕੇਸ ਖਿਲਾਰ..... ||

ਮਰੇ ਹੋਏ ਦਿਲ ਤੇ ਬੈਠਣ ਮੱਖੀਆਂ,

ਮਹਿਰਮ ਢੂੰਡਣ ਪਥਰਾਈਆਂ ਅੱਖੀਆਂ,

ਰੋਜ ਉੱਧੜਾਂ ਹੌਲੀ-ਹੌਲੀ

ਕੋਈ ਨਾਂ ਲੈਂਦਾ ਸਾਰ

ਅੱਧੀ ਰਾਤੀਂ ਪੀੜਾਂ ਕੂਕਣ

ਕੂਕਣ ਕੇਸ ਖਿਲਾਰ..... ||

ਕੁਆਰੀਆਂ ਮੇਰੀਆਂ ਅੱਖਾਂ ਚੁੰਘਣ,

ਬੁੱਲਾਂ ਕੋਲੋ ਹਾਸੇ ਡੁੰਘਣ,

ਉਦਾਸ ਖੂਹੀ ਮੈਨੂੰ ਦੱਬਣ

ਜਿੱਥੇ ਦੁੱਖਾਂ ਦੀ ਭਰਮਾਰ

ਅੱਧੀ ਰਾਤੀਂ ਪੀੜਾਂ ਕੂਕਣ

ਕੂਕਣ ਕੇਸ ਖਿਲਾਰ...... ||

ਚੂੰਡਣ ਮੇਰੇ ਹੱਡ ਨਰੋਏ,

ਮਸੀਂ-ਮਸੀਂ ਜਵਾਂ ਜੋ ਹੋਏ,

ਨਾ ਭੋਰਾ ਅਲਕਤ ਮੰਨਣ

ਖਾਵਣ ਵਾਰੋ-ਵਾਰ

ਅੱਧੀ ਰਾਤੀਂ ਪੀੜਾਂ ਕੂਕਣ

ਕੂਕਣ ਕੇਸ ਖਿਲਾਰ..... ||

ਸੂਲ ਨੇ ਮੇਰਾ ਅੰਦਰ ਖਾਇਆ,

ਸੁਪਨਾ ਮੇਰਾ ਹਰ ਤਿਰਹਾਇਆ,

ਰੀਝਾਂ ਭੁੰਨੀਆਂ ਵਾਂਗਰ ਖਿੱਲਾਂ

ਖੌਰੇ ਕੱਡਣ ਕਿਹੜੀ ਖਾਰ

ਅੱਧੀ ਰਾਤੀਂ ਪੀੜਾਂ ਕੂਕਣ

ਕੂਕਣ ਕੇਸ ਖਿਲਾਰ...... ||

ਰਾਤੀਂ ਮਰਦਾਂ, ਤੜਕੇ ਜੰਮਦਾਂ,

ਢੋਹ - ਢੋਹ ਕੇ ਦੁੱਖੜੇ ਹੰਬਦਾਂ,

ਮੁਕਤੀ ਦੇਵੋ ਏਸ ਸ਼ਰਾਪੋਂ

ਯਾਰੋ ਦੇਉ ਮੌਤ ਉਧਾਰ

ਅੱਧੀ ਰਾਤੀਂ ਪੀੜਾਂ ਕੂਕਣ

ਕੂਕਣ ਕੇਸ ਖਿਲਾਰ

ਅੱਧੀ ਰਾਤੀਂ ਪੀੜਾਂ ਕੂਕਣ

ਕੂਕਣ ਕੇਸ ਖਿਲਾਰ ..... || 

ਕਿਰਤਪਾਲ ਸਿੰਘ ਗਿੱਲ